Սույն թվականի հոկտեմբերի 9-ին Երևանի «Հայբուսակ» համալսարանի Մանկավարժության և հոգեբանության ամբիոնի դասախոսներ Արփինե Այվազյանի և Քրիստինե Պետրոսյանի նախաձեռնությամբ ԵՀՀ «Ռոսլին» արվեստի և հումանիտար գիտությունների ակադեմիայի «Հոգեբանություն» մասնագիտության 2-րդ, 3-րդ կուրսերի և «Մասնագիտական մանկավարժություն» (անգլերեն և գրականություն) մասնագիտության 2-րդ կուրսի ուսանողները «Մանկավարժական տեխնոլոգիաներ» թեմայի շրջանակում մասնակցեցին «Էրեբունի» պատմահնագիտական արգելոց թանգարանի «Արի՛, պեղենք միասին» կրթական ծրագրին։ Թանգարանին կից ուսումնական-լաբորատոր պեղավայրում ուսանողները «պեղեցին» և հայտնաբերեցին տարատեսակ հնագիտական իրերի կրկնօրինակներ՝ բացահայտելով հնագետի մասնագիտության առանձնահատկությունները: Այնուհետև, ուսանողները ծանոթացան Էրեբունի թանգարանի մշտական և ժամանակավոր ցուցադրություններին՝ ձեռք բերելով նոր գիտելիքներ Արարատի թագավորության պատմության, հարուստ մշակույթի, բնակիչների կենսագործունեության վերաբերյալ: Իսկ ահա Էրեբունի ամրոցում հնարավորություն ընձեռնվեց տեսնելու պեղումների ընթացքում հազարամյակների խորքից բացված հնամենի Էրեբունի քաղաքի տարբեր կառույցներ: Նման այցելությունները մեծապես սերմանում են սեր դեպի հայրենի ժառանգությունը և այն պահպանելու գաղափարը:
Երևանի «Հայբուսակ» համալսարանի «Ռոսլին» արվեստի և հումանիտար գիտությունների ակադեմիայի «Ընդհանուր մանկավարժություն» («Տարրական մանկավարժություն և մեթոդիկա») մասնագիտության 2-րդ կուրսի ուսանողները “Գործնական մանկավարժություն” առարկայի “Մանկավարժական տեխնոլոգիաներ” թեմայի շրջանակում մասնակցեցին «Էրեբունի» պատմահնագիտական արգելոց թանգարանի “Արի՛, պեղենք միասին” կրթական ծրագրին` մանկավարժության և հոգեբանության ամբիոնի դասախոս Արփինե Այվազյանի նախաձեռնությամբ։ Թանգարանին կից ուսումնական-արհեստակցական պեղավայրում ուսանողները պեղեցին և գտան հնագույն իրերի բեկորներ և կրկնօրինակներ։ Այդպիսով ուսանողները հնարավորություն ստացան հայտնաբերելու հնագույն իրերի բեկորներ և կրկնօրինակներ` հետագա մանկավարժական գործունեության ընթացքում աշակերտներին ներկայացնելու նպատակով:
Սույն թվականի Հունվորի 20-ին Երևանի «Հայբուսակ» համալսարանի մի խումբ օտարերկրյա ուսանողների համար համալսարանի Միջազգային և Հասարակայնության հետ կապերի բաժինների նախաձեռնությամբ կազմակերպվել է այց Երևանի Պատմության թանգարան: Ուսանողներին ցուցադրվեցին թանգարանների բոլոր սրահները` հնագույն ձեռագրերով, արտեֆակտներով, կերամիկայով և այլնով լի: Այցի նպատակն էր ծանոթացնել օտարերկրյա ուսանողներին մեր քաղաքի հնագույն պատմության և մշակույթի հետ։
Սույն թվականի դեկտեմբերի 25-ին տեղի ունեցավ վեբինար ՛՛Լեռնային Ղարաբաղի պատմամշակութային կողոթները և մշակութային ժառանգությունը՛՛ խորագրով:
Գիտությունների ազգային ակադեմիայի ավագ գիտաշխատող Գալուստ Հովսեփյանը ներկայացրեց համապարփակ տեղեկատվություն Արցախի պատմամշակութային կոթողների և մշակութային հարուստ ժառանգության մասին։ Մասնավորապես, պարոն Հովսեփյանը մանրամասն անդրադարձավ տարբեր եկեղեցիների, մասնավորապես Ամարասի վանքին, Ծիծեռնավանքին, Գանձասարին և Դադիվանքին։ Առաջին պատմամշակութային կոթողը, որը ներկայացվեց բանախոսի կողմից Արցախի Մարտունու շրջանի Մաճկալաշեն գյուղի մոտ Խազազ և Լուսավորիչ սարերի միջև ընկած գոգահովտում գտնվող Ամարասի վանքը։ Բացի վանքի հիմնադրման պատմությունից և ճարտարապետական հորինվածքից ներկայացվեցին նաև հետաքրքիր պատմություններ կապված վանքի հետ։ Երկրորդը ներկայացվեց Մարտակերտի շրջանի Վանք գյուղի մոտակայքում, պատմական Մեծ Հայքի Արցախ նահանգի Մեծ Առանք գավառում, Խաչենագետի ձախ ափին, Գանձասար լեռան վրա գտնվող Գանձասար վանքը։ Պարոն Հովսեփյանը պատասխանեց մասնակիցներին հուզող հարցերին կապված վանքի անվան ծագումնաբանության, ճարտարապետական կառուցվածքի, ինչպես նաև տարբեր ավանդույթների հետ։ Մասնակիցները տարաբնույթ հարցեր հղեցին նաև Ծիծեռնավանքի և Դադիվանքի վերաբերյալ։ Հատկապես մեծ էր հետաքրքրությունը Արցախի պատմամշակութային ժառանգության և կոթողների պահպանության և հետագա ճակատագրի մասին՝ հաշվին առնելով ստեղծված քաղաքական իրավիճակն ու ակնկալվող զարգացումները։ Միաժամանակ, շեշտադրեց ստեղծված իրավիճակում դրանց սպառնացող վտանգները, ընդհուպ մինչև ոչնչացումը, պահպանման տարբերակները, սերունդներին դրանց մասին տեղեկատվության փոխանցման կարևորությունն ու միջազգային հանրությանը դրանց մասին իրազեկման գործիքակազմը։
Սույն թվականի դեկտեմբերի 14-ին տեղի ունեցավ «Արցախյան պատմությունը և 2020 թվականին տեղի ունեցած պատերազմը» խորագրով միջհամալսարանական վեբինարը։ Երևանի պետական համալսարանի դասախոս, պատմական գիտությունների դոկտոր, պրոֆեսոր Աշոտ Հայրունին, Խաչատուր Աբովյանի անվան հայկական պետական մանկավարժական համալսարանի դասախոս, պատմական գիտությունների թեկնածու Նելլի Մինասյանը, Երևանի Հայբուսակ Համալսարանի դասախոս, պատմական գիտությունների թեկնածու Նարեկ Մարտիրոսյանը և ԵՀՀ միջազգային կապերի բաժնի ղեկավար Էլյա Ղիասյանը ներկայացրեցին Արցախյան պատերազմին, աշխարհաքաղաքականությանը և տարածաշրջանին վերաբերող մի շարք կարևորագույն հիմնախնդիրներ։
Երևանի պետական համալսարանի դասախոս, պատմական գիտությունների դոկտոր, պրոֆեսոր Աշոտ Հայրունին ներկայացրեց պատերազմի ընթացքում ՀՀ կողմից տեղեկատվական հարթակներում մղված պայքարի առանձնահատկությունները, թերություններն ու առաջնահերթությունները՝ համակողմանի վերլուծելով 21-րդ դարում վերջինս կարևորագույն դերակատարությունը։ Միաժամանակ նա առանձնացրեց հայ ժողովրդի արժեհամակարգի մասով առկա խնդիրները և հատկորոշեց դրանց կարգավորման և լուծման ուղիները։
Խաչատուր Աբովյանի անվան հայկական պետական մանկավարժական համալսարանի դասախոս, պատմական գիտությունների թեկնածու Նելլի Մինասյանը մանրամասն ներկայացրեց և վերլուծեց աշխարհաքաղաքական արդի իրողությունները, տարածաշրջանային ընթացիկ իրավիճակը և հետագա մարտահրավերները։ Բանախոսը ներկայացրեց նաև պանթյուրքիզմ հայեցակարգը, վերջինիս ձևավորման և կիրարկման յուրահատկությունները, Հարավային Կովկասի երկրների փոխհարաբերությունները և քաղաքական հետագա զարգացումները։
Իր ելույթում Երևանի Հայբուսակ Համալսարանի դասախոս, պատմական գիտությունների թեկնածու Նարեկ Մարտիրոսյանը ընդգծեց ԵԱՀԿ Մինսկի խմբի կողմից Արցախյան համակարտության, պատերազմի և հաջորդիվ զարգացումների մասով որդեգրած քաղաքականությունը, ՀՀ ներկայումս ծառացած կարևորագույն խնդիրները և այն բացթողումները, որոնք հանգեցրին պատերազմում մեր երկրի պարտությանը։
Հանդիպման վերջում երեք բանախոսները ներկայացրեցին այն գործիքակազմը, որի բարեհաջող գործարկումը կհանգեցնի ՀՀ առջև ծառացած խնդիրների լուծմանը։
27.09 Երևանի «Հայբուսակ» համալսարանի մի խումբ օտարերկրյա ուսանողների համար համալսարանի Միջազգային և Հասարակայնության հետ կապերի բաժինների նախաձեռնությամբ կազմակերպվել է այց Հայաստանի Պատմության թանգարան: Այցի նպատակն էր՝ ծանոթացնել օտարերկրյա ուսանողներին մեր հնագույն պատմության և մշակույթի հետ։ Քանզի միայն մեր անցյալը իմանալով և այն աշխարհին արժանապատվորեն ներկայացնելով կառուցելու ենք մեր ապագան և #հաղթելուենք
Երեկ ավարտվեց «Կրթություն XXI դար» միջազգային կրթական ցուցահանդեսը, որտեղ ներկայացված էին շուրջ 50 կրթական և մասնագիտական հաստատություններ:
«Կրթություն XXI դար» միջազգային կրթական ցուցահանդեսը կազմակերպվել էր ՀՀ կրթության և գիտության նախարարության աջակցությամբ, Երևանում Ռուսաստանի գիտության և մշակույթի կենտրոնի և «Ինտեր էքսպո» ցուցահանդեսային ընկերության կողմից:
Ինչպես ամեն տարի,այս տարի ևս Հայբուսակ համալսարանը իր տաղավարով մասնակցում էր կազմակերպված ցուցահանդեսին՝ ներկայացնելով բուհի նորությունները:
Ցուցահանդեսի ավարտին Հայբուսակ համալսարանն արժանացավ սերտիֆիկատի:
Հումանիտար ֆակուլտետի «Մանկավարժություն և հոգեբանություն» մասնագիտության 4-րդ կուրսի ուսանողները դասախոս Ա.Վահանյանի գլխավորությամբ Ա.Իսահակյանի տուն-թանգարանում կազմակերպեցին բաց դաս «Հոգեբանական օտարացում» առարկայի շրջանակներում:
Ուսանողների կողմից ներկայացվեց Ա.Քամյուի «Օտարը» վիպակի և Ա.Իսահակյանի «Աբու Լալա Մահարի» պոեմի համեմատական վերլուծությունը՝ ընդգծելով հոգեբանական օտարացման առանձնահատկությունները հերոսների ընկալմամբ: Դասն անցկացվեց ակադեմիական բանավեճի մեթոդով:
Բաց դասի արդյունավետ անցկացման համար շնորհակալություն ենք հայտնում թանգարանի տնօրեն Անժելա Խորենյանին և թանգարանի ողջ աշխատակազմին:
